Тау демалысына, шаңғы мен сноуборд тебуге құмар жандар үшін Талғар қаласының қасындағы «Ақ бұлақ» тау шаңғы курорты биыл күтпеген жерден жаңалық ашты. Күтпеген жерден дейтініміз бұл шаңғы курорты ұзақ жылдан бері қараусыз қалғандай күйде еді.
Табиғаты тамаша, Шымбұлақтай өте биік емес, қары басқа курорттармен салыстырғанда айтарлықтай қалың, шаңғы тебуді жаңа үйренетіндерге таптырмайтын осы курорт сан жылдан бері сыннан көз ашпай келген еді.
Биыл басшылығы ауысқан бұл курорт кемшіліктерін шетінен түзеп, келушілердің жақсы демалуына барынша жағдай жасапты.
Ең бірінші кезекте, қауіпсіздік басты назарға алыныпты.
«Ақ бұлақ» тау шаңғы курортының техникалық бөлімі бас директорының орынбасары Сұңқар Ысқақовтың айтуынша, техникалық парк жаңарған. Инфрақұрылым да жаңарудан өткен. Жыл он екі ай шұрық тесік болып жататын автотұраққа толық асфальт төселген. Шаңғыны жалға алу мен шаңғы мектебінің іші күрделі жөндеуден өтіп, жалға берілетін шаңғы мен киімдер тұтастай жаңадан алынған. Шаңғы трассасындағы шам жарықтар түгелімен ауысқан.
Ал «Ақ бұлақ» тау шаңғы курортының сату және маркетинг бөлімі директоры Жұлдыз Байболованың сөзінше, енді кассада билет алуға кезек болмайды. Өйткені, «Ақ бұлақ» ски-пасстерін Каспии банк арқылы толықтырып, кассаға жақындамай-ақ шаңғы тебе беруге болады. Сондай-ақ, «Шымбұлақ», «Ой-Қарағай» ски-пасстарын «Ақ бұлақта» қолдануға болады.
«Ақ бұлақ» өкілдері «Шымбұлақ» пен «Ой-Қарағай» тау курорттарына бәсекелес болып, келушіге таласу мақсатымыз емес дейді.
Олардың айтуынша, шаңғы мен сноубордты жаңадан үйренушілерге ең қолайлы, ең қауіпсіз жер ол — «Ақ бұлақ». Сондай-ақ, «Ақ бұлақ» отбасымен, бала-шағамен де таза ауада серуендеуге, шаңғымен сырғанауға, шана тебуге, атқа мініп серуендеуге өте ыңғайлы курорт.
«Ақ бұлақ» тау курорты Алматы облысында тұратын балаларға шаңғы тебуді тегін үйрететін үйірмелері жұмыс істей беретіндерін де айтып отыр. Бірақ, бұл үйірмеге қатысатын балалардың тізімін әлеуметтік, отбасылық жағдайын ескеріп Алматы облысы әкімдігі шешеді. Яғни, «Ақ бұлақ» тау курорты әкімдік тізімін бекіткен балаларды тегін шаңғы үйірмесіне алады.
Келушілердің қауіпсіздігі мен жақсы демалуы басты мақсатымыз деген «Ақ бұлақ» тау курорты осылайша биыл күрделі өзгерістер жасап, шаңғы маусымын ашық деп жариялады.Ертесі күні Алатауға көптен күткен қар да жауды.
Руслан Ербота
