Әлеуметтік желідегі Telegram арнасының иесі Павел Дуров Қазақстанда жасанды интеллект зертханасын ашқанын хабарлады.
«Бір жыл бұрын Қазақстанда алғашқы аймақтық кеңсемізді ашқанбыз және нәтижесіне көңіліміз толады. Бүгін Alem.ai ғимаратында жасанды интеллект зертханасын ашып жатқанымызды қуанышты түрде хабарлаймын. Бірінші кезекте біз Telegram жобасы және Қазақстанның жасанды интеллект министрлігі іске қосқан суперкомпьютерлік кластерімен ортақ жобаны жүзеге асырамыз. Бұл технология миллиардтан астам адамға жасанды интеллект функцияларын қауіпсіз, ашық және тиімді пайдалануға мүмкіндік береді” деді Астанадағы Digital Bridge форумында сөйлеген ол.
Азаттық радиосының хабарлауынша, 40 жастағы Павел Дуров Telegram-дағы заңсыз контенттің таралуына қатысты қылмыстық істер бойынша тергелген. Маусым айында Франция соты оған уақытша шетелге баруға рұқсат берген. Тергеу органдарының айтуынша, ол иелік ететін мессенжер контенттерге тиісті дәрежеде модерация жасамаған, үкіметтердің сұрақтарына жауап бермеген. Дуров айыптарды жоққа шығарады.
Digital bridge форумында Қазақстан басшысы Қасым-Жомарт Тоқаев, Венгрия басшысы Тамаш Шуйок, Telegram иесі Павел Дуров, Sinovation Ventures бас директоры Ли Кай Фу, Стэнфорд университетінің ғылыми қызметкері, Google сарапшысы Питер Норвиг, Стэнфорд университетінің профессоры Илья Стребулаев, G42 International бас директоры Мансур Ибрагим Әл-Мансур сөз сөйлеген.
Ақорданың хабарлауынша, осы форум аясында Қазақстан басшысы Қасым-Жомарт Тоқаев Дуровты қабылдаған. Ресми ақпаратқа қарағанда, кездесу барысында “білім, жасанды интеллект және киберқауіпсіздік саласындағы әріптестік мәселелері” талқыланған.
Қазақстан басшысы Telegram-ның елдің “цифрлық күн тәртібін дамытуға қатысты қолдауын” жоғары бағалаған.
Ақорданың жазуынша, Дуров Тоқаевқа “жасанды интеллект саласында ортақ жобаларды жүзеге асыру жоспарын” айтқан. Дуров әзірге өзінің желідегі парақшасында бұл кездесу жөнінде ештеңе жазған жоқ.
