4 қыркүйекте ұсталды делінген премьердің орынбасары, сыртқы істер министрі Мұрат Нұртілеудің бүгін, 5 қыркүйекте кездесу өткізгені жайында хабарланды. Бұл туралы ресми сайтта жария болды. Бірақ хабарлаған кездесудің дәл бүгін өткізілгені, әлде бұған дейін өткізілгені белгісіз.
Мәліметке қарағанда Мұрат Нұртілеу «Harvest Group» компаниясы директорлар кеңесінің төрағасы Алмаз Алсеновпен кездесу өткізген. Кездесудің бірнеше суреті де жарияланған.
Тараптар агро-индустриялық кластерді құру барысын талқылаған. Алғашқы кезеңде инвестициялық жоба Жетісу мен Алматы облыстарын қамтып, 150 мың гектар шалғайдағы және тыңайған жерлерді суармалы ауыл шаруашылығы алқаптарына айналдыруды көздейді. Жалпы, жобаны жүзеге асыру аясында заманауи су үнемдеу жүйелерін қолдана отырып, 300 мың гектар жерді игеру жоспарланған.
Министр жобаны одан әрі ілгерілетудің маңыздылығын атап өтіп, мемлекет тарапынан қолдау көрсетуге дайын екенін білдірді.
Сондай-ақ компанияның Қазақстанның бірқатар өңірлерінде туризм және спорт салаларында инвестициялық жобаларды іске асыру перспективалары белгіленгені хабарланды.
СІМ басшысы бұл жобалардың ішкі және кірме туризм үшін, сонымен қатар экономиканы әртараптандыру үшін өсу мүмкіндігіне айналу әлеуеті бар екенін баса айтты делінген ресми мәліметте.
4 қыркүйекте Orda сайты құқық қорғау органдарындағы дереккөздеріне сілтеп, «сыртқы істер министрі Мұрат Нұртілеу, бизнесмен Гаджи Гаджиев және ҰҚК-ның жоғары лауазымды қызметкерлері ұсталғанын» жазған еді.
Іле-шала мәдениет және ақпарат министрі Балаева Facebook желісіндегі жазбасында мұны «расталмаған ақпарат» деп, жалған ақпарат таратқан үшін әкімшілік әрі қылмыстық жауапкершілік барын ескерткен.
ҰҚК да өз қызметкерлеріне қатысты ақпаратты «шындыққа жанаспайтынын» мәлімдеген.
Артынша сыртқы істер министрлігінің ресми өкілі Айбек Смадияров Мұрат Нұртілеудің ұсталғаны жайлы ақпарат «шындыққа сәйкес келмейді,»- деп мәлімдеген. Ал орталық коммуникациялар қызметіндегі жалған ақпаратпен күрес орталығы да Мұрат Нұртілеу мен кәсіпкер Гаджи Гаджиевтің ұсталғаны жөнінде ақпаратты терістеген.
Ал Orda сайты лауазымды тұлғалардың ұсталғаны жайлы ақпаратты толықтырып жариялап отыр. «Ұсталды» деген тұлғалар болса, ауызша, не жазбаша өздеріне қатысты мәлімдеме жасамаған.
