Экс-президент Нұрсұлтан Назарбаевтың жұбайы Сара Назарбаеваның президент іс басқармасы медициналық орталығының Ұлттық госпиталіндегі емі одан әрі жалғасуда.
«Науқас емделіп жатыр. Барлық іс-шара медициналық көмектің бекітілген стандарттарына сәйкес және білікті мамандардың бақылауымен өткізіледі», — деп жауап берген госпиталь Tengrinews.kz сауалына.
Сара Назарбаеваның диагнозы мен қазіргі жағдайы медициналық құпия екені айтылады. Медициналық этикаға байланысты жай-күйі ашық жарияланбайды.
Мәліметтерге қарағанда, биыл 5 мамырда Сара Назарбаева ауыр хәлде жатқаны белгілі болды. Кейінірек Сара Назарбаева қайтыс болғаны туралы жалған ақпарат тарады.
Сара Назарбаева 1941 жылы 12 ақпанда Қарағанды облысы Бұқар жырау ауданының Қызылжар ауылында дүниеге келген. Инженер-экономист мамандығы бойынша білім алған. Өз тегі — Қонақаева.
1962 жылы Сара Назарбаева Нұрсұлтан Назарбаевқа тұрмысқа шыққан. Араға бір жыл салып Дариға есімді қызды дүниеге әкелді. Көп ұзамай Динара мен Әлия Назарбаева дүниеге келді.
Тәуелсіздіктің алғашқы жылдарында Сара Алпысқызы қоғамдық жұмыстарда белсенді болды. Елдің «бірінші ханымы» атанды. 1992 жылы «Бөбек» қорын ашты. Кейін «SOS Киндердорф» балалар ауылын ұйымдастырды.
Тоқсаныншы жылдардан кейін Сара Назарбаеваның белсенділігі төмендеді. Алдымен бірте-бірте ресми жиындардан көрінбей кетті. Соңынан ел алдына шығудан қалды. Ал оның жұбайы Нұрсұлтан Назарбаев президенттіктен кеткеннен кейін жазған мемуарында өзінің басқа адаммен көңіл жарастырғанын жариялаған.
Еске салайық, бұған дейін де Сара Назарбаева қайтыс болғаны туралы ақпарат тарады. Кейінірек тұңғыш президент Нұрсұлтан Назарбаевтың кеңесшісі әрі баспасөз хатшысы Айдос Үкібай бұл ақпарат шындыққа жанаспайтынын мәлімдеген.
