Қазақстан энергетика министрлігі халықаралық БАҚ-тағы Путиннің жарлығы Қазақстан мұнайының Қара теңіз арқылы тасымалдануын тоқтатқаны туралы ақпарат бойынша мәлімет берді.
Kazinform агенттігінің министрлікке сілтеп хабарлауынша, қазір Қазақстан мұнайын Ресей теңіз порттары арқылы тасымалдау тоқтатылған жоқ.
Министрліктегілер бұл жердегі мәселе Усть-Луга портындағы жағдайға қатысты екенін айтады.
«Бұл портта қазір көлік инфрақұрылымын қорғауды арттыру үшін қосымша шаралар енгізілгеніне байланысты «ҚазТрансойл» АҚ «Невская трубопроводная компаниясы» ЖШС-мен келіссөздер жүргізіп жатыр», — делінген ресми мәліметте.
Мұның алдында Reuters-ке мәлімет берген дереккөз Қазақстан мұнайы ресейлік ереженің салдарынан Қара теңіз арқылы экспортталмай қалуы мүмкін екенін айтқан.
Reuters атап өткендей, ресейлік ереже бойынша шектеулер Еуропа одағы Ресейге қарсы жаңа санкциялар енгізгеннен кейін бірнеше күн өткен соң енгізілген. Бұл шешім Каспий құбыр консорциумының жұмысын қиындатқаны туралы ақпарат тараған.
Ресей президентінің жарлығымен қолға алынған жаңа тәртіпке сәйкес, Ресей порттарына кіретін барлық шетелдік кемелер Федералдық қауіпсіздік қызметінен арнайы рұқсат алуы тиіс.
