22 шілдеде Қырғызстанның Чолпон-Ата қаласында өткен «Мейкин Азия» IV халықаралық музыка фестивалінің жабылуы рәсімінде әнші Димаш Құдайберген Қырғызстанның «Халық әртісі» атағымен марапатталды.
Kazinform агенттігінің хабарлауынша, екі күнге созылған фестивальдің жабылу салтанатында Қырғызстан президенті Садыр Жапаровтың жарлығына сәйкес, Қазақстанның Халық әртісі, әнші әрі композитор Димаш Құдайбергенге «Қырғыз Республикасының халық әртісі» құрметті атағы берілді.
Марапатты Димашқа мәдениет, ақпарат және жастар саясаты министрі Мирбек Мәмбеталиевтің қатысуымен Қырғызстан мемлекеттік хатшысы Марат Иманқұлов табыстады.
Чолпон-Ата қаласындағы «Мейкин Азия» IV халықаралық музыка фестивалі Дүниежүзілік көшпенділер ойындарының орталық ипподромында өткізілді. Осы өнер кешіне қонақ ретінде қатысып, ән шырқаған Димаш Құдайбергеннің бұдан алдын фестивалдегі қаламақыдан бас тартқаны хабарланған еді.
