Батыс Қазақстан облысы Сырым ауданы Жымпиты ауылында 4 маусымда күндіз бір отбасының бес баласы қаза болды. Болжам бойынша, олар газдан уланып мерт болған болуы мүмкін деп хабарладыды “Мой город” сайтына сілтеп Азаттық радиосы.
Мәліметке қарағанда БҚО денсаулық сақтау басқармасы “Балалардың барлығы жедел көмек көлігімен аудандық ауруханаға жеткізілді. Дәрігерлер барынша күш салды, бірақ оларды құтқару мүмкін болмады” деген хабарлама таратқан.
Сырым ауданы әкімдігінің хабарлауынша, Жымпиты ауылында жеке үйдің жанып жатқаны жөнінде хабар шамамен сағат 15:00-де түскен. Құтқарушылар оқиға орнына хабарлама түскеннен кейін бес минутта жеткен. Үйде 30 шаршы метр аумақта үйдің ішіндегі жеке заттар мен жиһаздар жанып жатқан. Ал балалар есінен танып қалған, оларды құтқраушылар алып шыққан.
Ақпаратқа қарағанда, қаза болған балалардың ең үлкені – 6 жаста. Қалғаны 2020, 2021, 2023 және 2024 жылы туған.
Отбасы жалға алынған үйде тұрған. Өрт кезінде ата-анасы жұмыста болған деп айтылады.
Қазақстанда балалардың топ-тобымен өрттен қаза болуы жиіледі. 2019 жылы 3 ақпанда астанада өрттен бір үйдің бес баласы қаза болған соң аналар наразылыққа шыққан. Сол наразылық сол жылы 19 наурызда Нұрсұлтан Назарбаев биліктен кеткен соң тоқтаған.
Биыл қаңтарда Қарағандыда өрт орнынан екі баланың денесі табылған. Былтыр күзде Астанадағы жеке үйлердің бірінде өрт шығып, 13, 9, 3, 2 жастағы төрт бала қаза тапқан. Оның алдында Қостанай облысы Жітіқара қаласында жеке үйде өрт болып, бес бала өлі табылған. Былтыр Қарағанды облысы, Талды ауылында өрттен бір үйдің төрт баласы кетіп қалды. 2023 жылы Абай облысы Аягөз қаласында бір үйдің төрт баласы өрттен қайтыс болған. 2021 жылы Жаңатас қаласында бір отбасының бес баласы, сол жылы Түркістан қаласында төрт бала анасымен бірге өрттен қаза тапқан.
