Ресей президенті Владимир Путин 8 мамыр — 11 мамыр аралығында атысты уақытша тоқтату режимін жариялады. Путин үш күндік режимді Екінші дүниежүзілік соғыстағы жеңістің 80 жылдығына орай ұсынып отыр. Бұл туралы Кремль хабарлады.
Кремльдің хабарлауынша, Ресей әскері 8-11 мамырда барлық әскери әрекетті тоқтатады.
Мәскеу Украина тарабы да «бұл режимді сақтауы тиіс» дейді. Ал режим сақталмаса, Ресей қарулы күштері тиісті жауап қатуы мүмкін екені айтылады.
Егер үш күндік режим жүзеге асса, бұл Ресейдің Украинаға басып кірген уақытынан бергі (2022 жылдың 24 ақпанынан бергі) атыс тоқтаған ең ұзақ сәт болмақ.
Украина тарабы Путин ұсынған режимге қатысты әзірге жауап берген жоқ.
Путин мұның алдында Пасха мерекесі тұсында оқ атуды тоқтату режимін жариялағанымен, оны бірінші болып Ресейдің өзі бұзған.
Жеңіс күні, яғни 9 мамырда Мәскеуде, Қызыл алаңда әскер шеру өткізілмек.
