Белгілі жазушы Мұхтар Мағауиннің «Тазының өлімі» хикаятының желісімен көркем фильм түсіру үшін сценарий іріктеу жұмыстары жүріп жатыр.
Kazinform агенттігінің хабарлауынша, бұл туралы премьер-министр Олжас Бектеновтің сенат депутатының сауалына жолдаған жауабында айтылған.
«Мұхтар Мағауиннің «Тазының өлімі» шығармасы негізінде көркем фильм түсіру мәселесі бойынша қазіргі уақытта қолайлы сценарийлерді іріктеу жұмыстары жүргізіліп жатқанын атап өтеміз», — деп жазылған жауапта.
Сондай-ақ жауапта тазы мен төбет күнін белгілеу ұсынысы да күн тәртібіндегі мәселе екені айтылған.
«Бұл мәселе бойынша қоғамдық ұйымдар мен кинологтар, тазы мен төбет селекционерлері 3 қыркүйекті осындай күн ретінде белгілеу мүмкіндіктерін талқыланғанын хабарлаймыз. Бұл осы күні қазақы ит тұқымының халықаралық деңгейде алғаш тіркелуіне, сондай-ақ «қазақ тазысының» алдын ала ресми халықаралық деңгейде танылуына байланысты», — деп жазады Олжас Бектенов.
Еске салсақ, белгілі жазушы Мұхтар Мағауин биыл қаңтар айында 85 жасқа қараған шағында эмиграцияда дүниеден озған еді.
