Талдықорғанда жасөспірім Шерзат Полаттың қазасына байланысты қозғалған қылмыстық іс бойынша алдын ала сот отырысы өтіп, судья негізгі сот процесін 17 сәуірге сағат 10-ға белгіледі. Бұл іс бойынша түрлі айып тағылған 9 адамның арасында кәмелетке толмаған жасөспірім де бар.
Бұл туралы Азаттық радиосы хабарлады.
Бейсенбі, 10 сәуір күні Жетісу облысының қылмыстық істер жөніндегі ауданаралық сотында Алматы облысы Талғар ауданында кісі қолынан қаза тапқан 16 жасар Шерзат Полаттың өліміне байланысты қылмыстық іс бойынша алдын ала тыңдауға жәбірленуші және айыпталушы тараптар, журналистер, блогерлер мен бақылаушылар қатысты.
Алдын ала сот тыңдауына төрағалық еткен судья Ержан Жанұзақов процесс өтетін залда орын шектеулі болғандықтан БАҚ өкілдері сот барысын монитормен жабдықталған жеке бөлмеден бақылай алатынын, ал сот залынан тікелей трансляция жүргізуге, сондай-ақ сотталушыларды фото мен видеоға түсіруге және жариялауға тыйым салынатынын хабарлап, оны бұзған жағдайда жауапкершілік жүктелетінін ескертті.
Судья сот отырысы Жоғарғы соттың YouTube-арнасында тікелей эфирде көрсетіліп жатқанынан хабардар етті.
Бұған дейін Шерзат Полаттың өлімі бойынша сот процесі қазақ тілінде ашық өтеді деп хабарланған. Судья орысша сөйлейтін адамдарға қазақ тілінен аудармашы қызметі ұсынылатынын айтты.
Осыдан кейін мемлекеттік айыптаушы сөз алып, қылмысты сотқа дейінгі тергеу материалдары бойынша дайындалған айыптау актісін оқыды. Онда былтыр 4 қазанда Алматы облысы Талғар ауданында пышақталып қаза тапқан жасөспірім Шерзат Полаттың өліміне байланысты 9 адамға түрлі бап бойынша айып тағылғаны жазылған. Сотқа дейін бұл қылмыстық іс бойынша 11 күдікті бар деп айтылған-ды.
Ал Талдықорғандағы сот залына 9 сотталушы әкелінді. Прокурор оларға қандай айып тағылғанын жария етті.
- Абзал Шынасыл – «Адам өлтіру» (99-баптың 2-бөлігі), «Адам өлтіруге оқталу» (24-баптың 3-бөлігі), «Бұзақылық» (293-баптың 3-бөлігі);
- Равиль Сакиев – «Адам өлтіруге оқталу» (24-баптың 3-бөлігі), «Адам өлтіру» (99-баптың 2-бөлігі), «Бұзақылық» (293-баптың 3-бөлігі);
- Азамат Тоқтаубаев – «Бұзақылық» (293-баптың 3-бөлігі), «Ұрлық» (188-баптың 1-бөлігі);
- Шыңғыс Белғожаев – «Бұзақылық» (293-баптың 3-бөлігі);
- Дархан Әскентаев – «Бұзақылық» (293-баптың 3-бөлігі);
- Нұрқияс Ілиясов – «Бұзақылық» (293-баптың 3-бөлігі);
- Дидар Қалиахмет – «Бұзақылық» (293-баптың 3-бөлігі);
- Нұрбол Тоқтаубаев – «Бұзақылық» (293-баптың 3-бөлігі) бойынша
және кәмелетке толмаған бір жасөспірімге «қылмыс туралы хабарламаған» (434-бап) деген айып тағылған.
Шерзат Полаттың қазасына байланысты қозғалған қылмыстық іс бас-аяғы 62 томнан тұрады.
