Ұжымдық қауіпсіздік шарты ұйымының (ҰҚШҰ) бас хатшысы Иманғали Тасмағамбетов өзін «ресейшіл» дегендерге жауап беріп, видеомәлімдеме жасады. Көптен бері Қазақстанның ақпарат кеңістігінде көрінбей кеткен экс-премьер тек қазақ тілінде, ақын-жазушылардан цитата келтіріп, мақал-мәтел араластыра сөйледі. Ту сыртында ҰҚШҰ-ға мүше елдердің тулары тұр.
Азаттық радиосының хабарлауынша, 6 минуттық видеоүндеу Иманғали Тасмағамбетовтің қандай да бір ресми байланыс арнасынан емес, әлеуметтік желідегі парақтарға тарады.
Бұған дейін оның осы қызметте жасаған бірнеше мәлімдемесін көпшілік «Кремльмен үндес» деп сынаған. Әсіресе, Тасмағамбетовтің «Еуропа Украинаға бітімгер әскерін кіргізсе, ҰҚШҰ Ресейге түрлі көмек ұсынуға дайын» деген сөзі қатты сынға қалған. Саясаткерді «қазақтарды соғысқа тартпақ» деп кінәлағандар да болды. Тасмағамбетов мұны видеоүндеуінде «қасаң әңгіме» деп атады.
«Туған жеріне салмағы жоқ, жел айдаған дәнсіз қауыз сияқты кейбір бақытсыз жандар үшін мен «ресейшіл», «сатқын» екенмін. Сонда қалай? Келісім сөздің күші емес, зымыранның мысы басып тұрған мына заманда халықаралық әскери ұйымға туған елімнің атынан барып, қауіпсіздік үшін отқа, мүдде үшін суға түскенім үшін бе?»- деп ашулана сұрақ қояды Тасмағамбетов. Бірақ ол видеода әлеуметтік желідегі жұртты жалпылай айтқанымен, ешкімнің аты-жөнін атаған жоқ.
Тасмағамбетов сөзінде Ресейдің Украинаға ашқан соғысын мақтамайды да, сынамайды. Тек «адамзатқа төніп тұрған» әлдебір «соғыс қаупі» туралы айтады.
«Бұл соғыста жеңімпаз болмайды. Бәрі де жеңіледі. Мұндай жағдайда біреудің сойылын соғу нағыз соқырлық, ал өз ұлтына соғыс тілеу қаніпезерлік болар еді», – деді Тасмағамбетов.
Ол «тәуелсіз Қазақстанның дамуына аз да болса, үлес қосқанын, осы жолда талай сый да, сын да көргенін» айтады. Екінші дүниежүзілік соғыста әкесінің екі ағасы қаза тапқанын, соғыс зардабын білетінін, сондықтан халықты соғысқа тартуы мүмкін емесін айтады. Ол өзіне сеніп тапсырылған қай қызмет үшін болса да ұялмайтынын, халық мүддесін әрдайым жоғары қоятынын ескертеді.
Сөз соңында Тасмағамбетов елді Ораза айтпен құттықтады.
Қазақстанның 30 жылдық тарихында артынан жағымды-жағымсыз әр түрлі сөз ерген саясаткерлердің бірі, осы – Иманғали Тасмағамбетов. Ол премьер-министр болғанда да, Атырау облысының, Алматы мен Астана қалаларының әкімі болған кезде, қорғаныс министрлігін басқарғанда, Ресейге елшілікке кеткенде де баспасөзден түскен емес.
Зиялы қауым мен рухани ортаға жақын саясаткер 2006 жылғы Алматыдағы «Шаңырақ» оқиғасына байланысты талай сын естіді. Оның экс-президент Нұрсұлтан Назарбаевты «рухани ұстаз», өзін «Назарбаевтың өнімімін» деп атағаны да көпке белгілі.
