Жамбыл облысындағы екі ауданда зілзала салдарынан17 әлеуметтік нысан бүлінген. Оның ішінде 11 білім беру, 2 — денсаулық сақтау, 2 — әлеуметтік қорғау, 1 — спорт және 1 — мәдениет нысаны бар. Жекелеген үйлер де зардап шеккен. Қабырғалары шытынаған, сылағы түскен.
Бұл туралы Жамбыл облысының әкімі Ербол Қарашөкеев пен төтенше жағдайлар вице-министрі Кеген Тұрсынбаев бастаған үкіметтік комиссия Т.Рысқұлов ауданындағы зардап шеккен тұрғын үйлер мен әлеуметтік нысандарды аралаған кезде айтылған.
Ауыл мектебі ғимаратының да бүлінген жерлері анықталды.
Құрамына облыс әкімдігінің, сейсмологиялық бақылау және зерттеулердің ұлттық ғылыми орталығының, сондай-ақ түрлі министрліктер мен ведомстволардың өкілдері кіретін жұмыс тобы құрылды.
Мерке және Т.Рысқұлов аудандарының ауылдық елді мекендерінде комиссия мүшелері ғимараттар мен тұрғын үйлерді аралап, жай-күйін көзбен көріп, техникалық тексеру жүргізеді.
Ауылдық округ әкімдіктеріне тұрғындардан баспаналардың зардап шеккені туралы 104 арыз-шағым түскен. Тұрғын үйлерді тексеру жалғасып, шығын көлемі анықталып жатыр.
Қазіргі уақытта облыстағы жағдай тұрақты екені айтылады.
Еске сала кетейік, 28 наурызда Алматыдан 323 шақырым жерде жер сілкінісі болған еді. Оның қарқындылығы Мерке ауылында — 5.0 балл, Құлан ауылында — 4.0 балл, Шу қаласында — 2.0 балл шамасында болған.
Сол күні Мьянмада болған қуаты 7,7 және 6,4 магнитудалы жойқын жер сілкіністерінің салдарынан қазірге дейін 1644 адамның қаза тауып, 3408 адамның зардап шеккені айтылады. Зілзала Қытай мен Тайваньда да болған.
