Батыс Қазақстанда ұшқышсыз ұшу аппаратының бөлшектеріне ұқсайтын заттар табылды. Бөлшектердің елді мекеннен аулаққа құлағаны айтылады. Бұл туралы мәліметті 26 наурызда облыстық полиция департаменті де растаңве. Әзірге табылған бөлшектердің суреті немесе видеосы жарияланған жоқ.
БҚО полициясы уәкілетті органдармен бірлесіп «Жәнібек ауданынан табылған пилотсыз ұшу аппаратының бөлшектеріне ұқсас заттарды тексеру шараларын жүргізіп жатқанын» айтты.
Ресеймен шектесетін БҚО аумағында биыл осымен төртінші рет кімге тиесілі екені белгісіз ұшу аппараты табылып отыр.
24 наурызда Жанібек ауданы аумағынан дрон бөлшектеріне ұқсас заттар табылған.
18 наурызда тағы бір дрон Тасқала ауданы аумағына құлағанын Атамекен ауылының тұрғындары хабарлаған. Заттың ұзындығы – 300 см.
18 ақпанда Бөкей ордасы ауданы Ұялы ауылының маңына ұшатын аппарат құлаған.
Құзырлы орындар бұл оқиғаларға байланысты әлі күнге дейін қоғамға толымды ақпарат бермей отыр. 26 наурызда Қорғаныс министрлігінің баспасөз қызметі Азаттық Азия агенттігінің сұрағына берген жауабында «барлық фактілер бойынша тергеу жүргізіліп жатқанын» ғана айтты.
BES.media басылымы Ұялыда табылған дронның пішіні Ресейдің «Орлан-10» дронына ұқсас деп жазды. «Рособоронэкспорт» сайтының мәліметінше, мұндай дрон жер мен су бетін қашықтан бақылауға, GSM базалық станциялары мен ұялы байланыс желілерін анықтауға арналған.
Батыс Қазақстан облысы аумағынан 18 ақпан мен 18 наурызда табылған дронға ұқсайтын екі заттың фотолары әлеуметтік желіде жарияланған.
Қазақстанның Ресеймен шекаралас аудандарында бұрын әскери зымыран қалдықтары бірнеше рет табылған. Ресейдің Астрахан облысында Капустин Яр әскери полигоны орналасқан. 2018 жылы жазда Батыс Қазақстан өңіріне құлаған зат сол полигоннан ұшырылған зымыранның бөлшегі екені анықталған.
Қазақстанға дүркін-дүркін құлаған дрондар жайлы қорғаныс министрлігі өкілі мәлімет таратқанымен, онда нақты ақпарат айтылмаған. Дрон қай елдікі, қашан, қалай құлаған, оның жауапкершілігі кімде — бұл туралы ақпарат жоқ. Министрлік тек қана тексеру жүріп жатқанын хабарлаумен шектелген. Журналистер 27 наурызда депутаттардың да пікірін білмек болғанда, олар да жалпылама жауап берген. Ал оқиға орнына барған депутаттар болмаған.
