Баспасөзде «Қазақстандық-израильдік миллиардер» аталатын олигарх, Eurasian Resources Group (ERG) және Еуразиялық қаржы компаниясының акционері, директорлар кеңесінің төрағасы Александр Машкевич өмірден озды.
Kazinform агенттігінің хабарлауынша, бизнесін 4 құрлықта жүргізетін ERG компаниясы ірі акционерлерінің бірі Александр Машкевич 1954 жылы Қырғызстан астанасы Бішкек қаласында дүниеге келген.
«Еуразиялық қаржы компаниясы» АҚ, «Еуразиялық өнеркәсіп компаниясы» АҚ және «Еуразиялық өндірістік компания» ЖШС-іне Патох Шодиев және Ибрагимовтер әулетімен тең иелік еткен Александр Машкевич Қазақстан президенті жанындағы Шетелдік инвесторлар кеңесінің мүшесі болды. Сондай-ақ Қазақстанның Ат спорты федерациясының құрметті президенті қызметін атқарды.
Машкевичтің айықпас ауыр дертке шалдығып, ұзақ уақыт ауырғаны айтылады.
Президент Қасым-Жомарт Тоқаев миллиардердің қазасына орай көңіл айтып, жеделхат жолдаған. Жеделхатта оның Қазақстан өнеркәсібін дамытуға «сіңірген еңбегі» жайлы айтылады.
Машкевичтің байлығы 3,7 млрд долларды құрайтыны хабарланған.
