Алматыда тауда рұқсат етілмеген тұста шаңғы тепкен үш адам қар көшкіні астында қалып, оның біреуі қаза тапты.
Алматы қалалық төтенше жағдай департаментінің мәліметінше, 112 пультіне «Шымбұлақ» тау-шаңғы курортының диспетчерінен Комсомол шыңы маңында қар көшкіні болғаны туралы хабарлама келіп түскен.
Нақтыланған ақпарат бойынша үш адам «Шымбұлақ» курортынан 1 км қашықтықта тыйым салынған жерде сырғанаған.
«Шаңғымен сырғанау кезінде үш адам көлбеуді кесіп, қар көшкіні жүруіне себеп болды. Салдарынан үшеуі де үйінді астында қалды. Екеуі өз бетінше үйінді астынан шықты, үшінші адамның жансыз мәйітін «Шымбұлақ» құтқарушылары қар астынан алып шықты», — деп хабарлады қалалық төтенше жағдай департаменті.
Кейіннен белгілі болған мәліметке қарағанда қар көшкінінен қаза тапқан 24 жастағы адамның Ресей азаматы болып шыққан.
Бұған дейін де Шымбұлақта ескерту жасалғанына қарамастан, тыйым салынған тұстан шаңғышылар қар көшкініне себеп болған еді. Қар көшкініне себепкер болған шаңғышыларды жазаға тарту қарастырылып жатқаны хабарланған.
