Қаржылық мониторинг агенттігі бас прокуратураның үйлестіруімен және Ұлттық қауіпсіздік комитетімен бірлесе отырып, іздеуде болған бұрынғы шенеунік, Ақтау әкімінің орынбасары болған Тимур Сәдуақасовты Қазақстан аумағына жеткізді.
Ол аса ірі көлемде алаяқтық жасағаны және лауазымды тұлғаларға пара беруге итермелегені үшін күдікке ілінген. Бұл туралы Kazinform хабарлап отыр.
2023 жылғы шілде айында Тимур Сәдуақасов пен адвокат Құрманбаев С.Н. өздерінің қызметтік байланысын пайдаланып, Долгалев В.И.-дің іскерлік серіктестеріне қатысты сотқа дейінгі тергеу бастау мәселесін шешуді ұсынғаны айтылады.
Аталған мәселені шешу үшін Сәдуақасов пен Құрманбаев С.Н.-ға заңсыз сыйақы ретінде 225 млн теңге беру жөнінде келісім жасалған. Күдіктілер параның алғашқы бөлігі – 90 млн теңгені алған делінеді.
Кейін Сәдуақасов қылмыстық жауапкершілікке тартылудан қауіптеніп, соттан жасырынған.
Ол мемлекеттік шекараны заңсыз кесіп өтіп, Өзбекстанға шыққанда ұсталған. Соған байланысты оған қатысты шекараны заңсыз кесіп өткені үшін қылмыстық іс те қозғалған.
2025 жылғы 25 ақпанда Түркістан облысындағы «Қапланбек» шекара бақылау-өткізу пунктінде ол Қаржылық мониторинг агенттігінің қызметкерлеріне тапсырылып, кейін Шымкент қаласындағы тергеу изоляторына қамалды.
