Ресей тарапының бастамасымен Владимир Путин Әзербайжан президенті Ильхам Әлиевпен телефон арқылы сөйлесті. Бұл туралы Kazinform агенттігі ақпарат таратты.
Мәліметке қарағанда, Қазақстанның Ақтау қаласына жақын маңда Әзербайжан әуе компаниясының жолаушылар ұшағының апатқа ұшырауына қатысты мәселелер жан-жақты талқыланған.
Владимир Путин қайғылы оқиғаның «Ресей әуе кеңістігінде орын алғаны үшін кешірім» сұрап, қаза болғандардың отбасыларына тағы да көңіл айтатынын білдірген.
Әңгіме барысында кесте бойынша ұшатын Әзірбайжанның жолаушылар ұшағы Грозный әуежайына бірнеше рет қонуға әрекеттенгені айтылды. Сол кезде Грозный, Моздок және Владикавказға украиналық жауынгерлік ұшқышсыз ұшатын аппараттар шабуыл жасаған, ал ресейлік әуе қорғаныс жүйелері бұл шабуылдарға тойтарыс берген.
Ресейдің Тергеу комитеті ҚК 263-бабы (Әуе көлігін пайдалану және қозғалыс қауіпсіздігі қағидаларын бұзу) бойынша қылмыстық іс қозғаған. Бастапқы тергеу әрекеттері жүргізіліп, азаматтық және әскери мамандардан жауап алынуда.
.
