Желтоқсанның 25-інде Ақтау маңындағы Ақшұқыр ауылына жақын тұсқа Бакуден Грозныйға бағыт алған Azal Airlines әуе компаниясына тиесілі жолаушылар ұшағы құлады. Ұшақта 67 жолаушы, 5 экипаж мүшесі болған. Апат салдарынан ұшақтағы адамдардың көбі қаза тауып, 29-ы тірі қалды. Зардап шеккендер ауруханаға жеткізілді. Оның екеуі — бала. Ұшақта бірнеше елдің азаматтары болған. Қазақстанның 6 азаматының бәрі қаза тапқан.
Грозный әуежайының баспасөз қызметінің мәліметінше, әуе бағытын бұруға қалың тұман себеп болды. Ұшақ алдымен Махачкалаға, содан кейін Ақтауға бағыт алған.
Мәліметтерге қарағанда, сағат 11:20-да Бакуден Грозныйға ұшқан ұшақтың Ақтау әуежайына шұғыл қонуды сұрағаны туралы алғашқы хабарлама түскен. Сағат 11:30-да әуежайдан 3 километр жерде ұшақтың апатқа ұшырағаны туралы ақпарат түскен.
Әзербайжан ақпарат агенттіктерінің оқиға орнынан таратқан видеосында ұшақ фюзеляжындағы шұрқ тесіктер байқалған.
Сарапшылар әртүрлі болжам жасауда. Бірақ ресми қорытынды тек тергеу аяқталған соң белгілі болады.
Бұған қоса 25 желтоқсанда Грозный қаласы Украина дрондарының шабуылына ұшыраған еді. Бұл — ай ортасынан бергі осындай екінші мәрте жасалған шабуыл. Бұл шабуылға қарсы Ресейдің әуе қорғанысы жүйесі іске қосылған.
Әзербайжан президенті Ильхам Әлиев ТМД елдері басшыларының бейресми саммитіне қатысу үшін Санкт-Петербургке аттанып ұшып бара жатқан кезде, әуе апаты туралы хабар беріліп, орта жолдан кері қайтуға мәжбүр болған. Ақтауға шұғыл комиссия аттандырған Әзербайжан президенті апат себебі туралы айтуға әзірге ерте екенін айтқан.
Ұшақ апаты кезінде қайтыс болған Қазақстан азаматтарының тізімі жарияланды.
— Төлесінов Сәндібек Екібайұлы, 16.11.1988 жылы туған, туған жері: Маңғыстау облысы, Жаңаөзен қаласы;
— Жұмағұлов Бауыржан Жұмабайұлы, 30.09.1985 жылы туған, туған жері: Маңғыстау облысы, Жаңаөзен қаласы;
— Махсудова Галина Растамбековна, 12.01.1978 жылы туған, туған жері: Маңғыстау облысы, Ақтау қаласы;
— Шаймерденова Гаухар Жұмағатқызы, 17.07.1975 жылы туған, туған жері: Алматы қаласы, Астана қаласының тұрғыны;
— Жұмағат Эльдар 23.08.2013 жылы туған, Астана қаласының тұрғыны;
— Джутаева Салима Аманжолқызы, 21.02.1995 жылы туған, туған жері: Қостанай облысының тумасы, тұрған жері Қарағанды қаласы.
