Бірқатар ел БРИКС халықаралық ұйымына «серіктес ел» болуға дайын екенін растады, бұл статус оларға 2025 жылғы 1 қаңтардан бастап беріледі. Оның бірі – Қазақстан. Бұл туралы Ресей президентінің көмекшісі Юрий Ушаковтың сөзіне сүйенген ТАСС агенттігі хабарлады.
«[Қазан қаласындағы] саммиттің қорытындысы бойынша БРИКС-ке «серіктес елдер» санатын құру және 13 мемлекеттің келісімін алу маңызды болды. Оларға шақыру жіберілді. БРИКС-ке серіктес болуға дайын екенін әзірге Беларусь, Боливия, Индонезия, Қазақстан, Куба, Малайзия, Таиланд, Уганда және Өзбекстан растады», – деді Ушаков.
Ресей президентінің көмекшісі бұл елдер 2025 жылғы 1 қаңтардан бастап БРИКС-ке «серіктес ел» статусына ресми түрде ие болады» деді. Ушаковтың сөзінше, тағы төрт елге шақыру жіберілген, алайда олардан әзірге жауап түспеген.
Астананың БРИКС-ке серіктес болатынын Қазақстан сыртқы істер министрлігі растады деп жазды Tengrinews.kz сайты. Бірақ шешімге байланысты қандай да бір түсініктеме берілген жоқ. Бұл статус Қазақстанға не беретіні де нақты айтылмады.
Ағылшын тілінде BRICS — Бразилия, Ресей, Үндістан, Қытай және Оңтүстік Африка Республикасы елдерінің бірінші әріптерінен құралған ұйым. 2006 жылы Бразилия, Ресей, Үндістан және Қытай экономика министрлерінің қатысуымен өткен Санкт-Петербургтегі экономикалық форпумда негізі қаланған. 2010 жылы Оңтүстік Африка республикасы қосылып, БРИКС ұйымы пайда болды.
БРИКС мүшелері әлем елдеріне несие беретін Халықаралық валюта қоры, Дүниежүзілік банк сияқты бүкіләлемдік ұйымдарда Батыс елдері басымдыққа ие, оларға тепе-тең күш керек, дамушы экономикалардың да үні естілуге тиіс деген идеяның айналасына біріккен.
Оның мақсаты — дамушы елдердің басын біріктіріп, Солтүстік Америка мен Батыс Еуропаның бай мемлекеттеріне балама күш қалыптастыру.
Қазақстан президентінің кеңесшісі — баспасөз хатшысы Берік Уәли қазан айында Қазандағы саммит алдында «Қазіргі таңда және жақын болашақта Қазақстан БРИКС-ке мүшелікке өтініш бермейді. Бұл шешім ұйымның даму перспективалары мен көп сатылы процесін ескере отырып қабылданған,»- деген. Одан беріде елдің саяси тұлғалары бұл бағытта әрқандай бір ишара білдірген емес.
