Солтүстік Қазақстан облысында адамның иммунтапшылық вирусы инфекциясын жұқтыратындар саны артып отыр. Өңірлік АИТВ инфекциясының профилактикасы жөніндегі орталықтың мәліметінше, қазіргі уақытта дертті жұқтырған 1,4 мыңға жуық адам есепке алынған, деп хабарлайды Kazinform агенттігі.
Орталықтың бөлімше меңгерушісі Қарлығаш Ақынованың айтуынша, адамның иммунтапшылық вирусы инфекциясын (АИТВ) қазір жыл сайын жаңадан 100-ден астам адам жұқтырады. Бұрын жұқтырғандардың 90 пайызы ине арқылы есірткі тұтынатындар делінетін, қазір 50 пайызы жыныстық қатынас арқылы ауруға шалдыққандар екені анықталған.
«Қазіргі уақытта біздің бақылауымызда 10 бала бар. Олар ауруды аналарынан жұқтырған. Ескере кетер жайт, шамамен соңғы 5 жылдан бері бізде мұндай жайттар жаңадан тіркелген жоқ. Бізде АИТВ жұқтырған аналар жылда босанады, олар дер кезінде алдын алу емін алады. Нәтижесінде дені сау бала туады. Мұндай нәрестені біз 1,5 жыл бақылаймыз. Үш рет ПЦР-талдау жасап, ВИЧ бар-жоғын анықтаймыз, кейін бала 1,5 жасқа келгенде иммуноферменттік талдау жүргізіп, ауырмайтынына көз жеткізіп барып, есептен аламыз. Мұндай балалар бізде көп», — дейді орталық маманы.
АИТВ жұқтырғандар өмір бойы емделуі қажет. Қазіргі уақытта осы инфекцияны жұқтырғандар қабылдайтын препараттардың барлығы ауруды басуға, вирустың көбеюіне жол бермеуге негізделген. Вирустан толық құтқаратын ем әлі табылған жоқ.
2006 жылы Шымкенттегі ауруханалардың бірінде қан құю кезінде ВИЧ (адамның иммундық тапшылық вирусы) дертін жұқтырған 100-ден аса бала анықталып, 20-дан аса адам істі болған. Сол кезде денсаумин Ерболат Досаев қызметінен босаған.
