Жаңа Конституция үшін жалпыұлттық референдум 15 наурызға белгіленді. Қазақстан президенті Қасым-Жомарт Тоқаевтың осы туралы жарлығы Ақорда сайтында жарияланды.
Президент жарлығына қарағанда, азаматтарға «БАҚ-та 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?» деген сұрақ қойылады.
12 ақпанда жаңа Конституция БАҚ-та жарияланбақ.
Қазақстанда бұған дейін де 1998, 2007, 2011, 2017, 2019 және 2022 жылдары Конституцияға өзгерістер енгізілген.
Бұл жолғы өзгертулер арасында – «құрылтай» атауына ие болған бірпалаталы парламентке көшу, вице-президент қызметін енгізу, халық кеңесін бекіту, шетелден қаржыландыруға тыйым салу, азаматтарды ұстау тәртібі және өзге де өзгерістер бар. Сарапшылар бұған түрлі баға берген.
2022 жылғы Қаңтар оқиғасынан кейін президент Тоқаев бұрынғы билік тұсында енгізілген пропорциялық сайлау жүйесін сынап, Қазақстанда араға едәуір жыл салып, аралас сайлау жүйесі қайта енгізілген еді. Алайда Конституцияның жаңа жобасында бір палаталы парламенттің толықтай партиялық тізім бойынша жасақталатыны жазылған.
Азаматтық қоғам өкілдері, сарапшылар мен құқық қорғаушылар, белсенділер президент Тоқаевты Конституцияны өзгертуде асығыстық танытпауға шақырып, толымды талқылау өткізу керегін ескерткен. Жаңа Конституцияның жобасы кіріспе, 11 бөлім және 95 баптан тұрады.
