Шымкентте 20 қаңтар күні күндіз көше ортасында болған жаппай төбелес кезінде бір адам қаза тапты. Төбелеска қатысқан тағы бір адамның жағдайы ауыр.
Kazinform агенттігінің хабарлауынша, қалалық денсаулық сақтау басқармасы төбелеске қатысқан 1990 жылы туған адамның ауыр жағдайда №1 қалалық клиникалық ауруханаға жеткізілгенін айтып отыр. Дәрігерлер оған барлық қажетті медициналық көмекті көрсетіп жатыр.
– Науқаста сол жақ кеуде қуысының енетін пышақ-кесілген жарақаты анықталып, шұғыл түрде операциялық ем жүргізілді. Қазіргі уақытта науқастың жағдайы ауыр, жан сақтау бөлімінде ем қабылдап жатыр, – деді қабылдау бөлімінің меңгерушісі Талғат Шауенов.
Еске салсақ, 20 қаңтарда Ерімбетов пен Рысқұлов көшелерінің қиылысында көлік жүргізушілері мен жолаушылары арасында жанжал шығып, соңы жаппай төбелеске ұласқан. Оқиға салдарынан 40 жастағы ер адам пышақ жарақатынан көз жұмды, тағы бір азамат ауруханаға жеткізілді. Аталған қылмысқа қатысы бар төрт күдікті ер адам анықталып, ұсталды. Оқиға бойынша «адам өлтіру», «бұзақылық» және «адамды ұрлау» баптарымен қылмыстық іс қозғалған.
