Шешенстан басшысы Рамзан Қадыровтың жол апатына ұшыраған ұлы Мәскеуге жеткізілгені жайында мәлімет тарады.
Flightradar24 дерегінше, Шешенстан басшысының ұшағы мен төтенше жағдай министрлігінің «медициналық ұшағы» 17 қаңтарға ауған күні түнде Мәскеуге қонған. «ВЧК-ОГПУ» телеграм арнасы Адам Қадыров Боткин ауруханасының тоғызыншы хирургия корпусына жатқызылғанын жазды. Пациенттің жағдайы «ауыр» екені айтылады.
16 қаңтарда Шешенстан басшысының ұлы жол апатына ұшырағаны хабарланған еді. Кавказ.Реалии сайты дереккөзінің айтуынша, 18 жастағы Адам Қадыров көліктерді бірінен кейін бірін басып озып, қатты жүрген. Рөлде Адам Қадыровтың өзі болған.
«Көлік жүрісінен жаңылып, әлдебір қоршауға соғылған. Ол рөлді басқара алмай қалған сияқты» деді редакцияның дереккөзі.
Жол апатынан кейін Қадыров Грозныйдағы республикалық жаңа ауруханаға жеткізілген. Кейін Кавказ.Реалии дереккөзі Шешенстан басшысының ұлы есін жиғанын және «оның өміріне қауіп жоғын» айтты, алайда оны Мәскеуге ауыстырған.
