Бүгін Астанада «АстраЗенека» британдық-швед биофармацевтикалық компаниясы мен Астанадағы британдық ЖОО Coventry University Kazakhstan арасында ынтымақтастық туралы келісімшартқа қол қойылды. Бұл келісім университет студенттері үшін жаңа мүмкіндіктерге жол ашады: «АстраЗенека» компаниясы жетекші сарапшылардың қатысуымен қонақ дәрістері мен шеберлік сыныптарын, одан әрі жұмысқа орналасу перспективасымен тағылымдамалар ұйымдастырады. Сонымен қатар, компания прогрессивті білім беру бағдарламаларын іске асыру үшін университеттің кітапхана қорын құнды ғылыми және оқу материалдарымен толықтыруға ниетті.
Қол қою рәсіміне Ұлыбритания Елшілігінің бизнес және сауда департаменті директорының орынбасары Стивен Бреннан, «АстраЗенека» Қазақстан директоры Мария Шипулева, сондай-ақ Coventry University Kazakhstan президенті Мирас Дәуленов қатысты.
«АстраЗенека» Қазақстан директоры Мария Шипулева мына жайларды атап өтті:
«Coventry University Kazakhstan-мен келісім біз үшін маңызды оқиға, өйткені ол британдық тамыры бар екі мықты ғылыми ұйымды біріктіреді және ол биофармацевтика саласындағы жас таланттарды қолдау мен дамытуға бағытталған. Біздің ынтымақтастығымыз студенттерге айтарлықтай пайда әкеліп қана қоймай, білім, тәжірибе және инновациялармен алмасу үшін жаңа мүмкіндіктер аша отырып, Қазақстанның ғылымы мен бизнесін одан әрі дамытуға үлес қосатынына сенімдіміз».
Ал Coventry University Kazakhstan президенті Мирас Дәуленов «Қазақстандағы алғашқы британдық зерттеу университеті Coventry University Kazakhstan осы жылдың қыркүйек айында студенттерге есігін айқара ашады. Университет заманауи, әрі қарқынды дамып келе жатқан Coventry University (Ұлыбритания) ғаламдық желісінің бөлігі атана отырып, Қазақстандағы және шетелдегі ірі корпорациялармен қарым-қатынасты орнатты. «АстраЗенекамен» ынтымақтастық біздің студенттеріміз үшін жұмысқа орналасу мүмкіндіктерін кеңейтеді», — деп атап өтті қол қою барысында
Келісімнің шарттарына сәйкес осы күзде тараптар бірқатар білім беру жобалары мен бастамаларын қамтитын өзара іс-қимыл жоспарын бекітуге ниетті.
«АстраЗенека» онкология, кардиология, нефрология және метаболизм, тыныс алу және аутоиммундық, сондай-ақ сирек кездесетін аурулар сияқты терапевтік салаларда рецепт бойынша дәрі-дәрмектерді зерттеуге, әзірлеуге және нарыққа шығаруға бағыт алған халықаралық инновациялық биофармацевтикалық компания болып табылады. Штаб-пәтері Кембриджде (Ұлыбритания) орналасқан «АстраЗенека» компаниясы 100-ден астам елде таныстырылған және оның инновациялық препараттарын бүкіл әлем бойынша миллиондаған пациенттер пайдаланады. Ал Coventry University Kazakhstan – бүкіл әлем бойынша Coventry University филиалдары жаһандық желісінің бөлігі. Бүгінгі күні Египетте, Қытайда, Мароккода, Үндістанда және басқа елдерде 21 000-нан астам студент білім алатын кампустары табысты жұмыс істеуде. 1843 жылы негізі қаланған Coventry University Ұлыбритания мен әлемнің жетекші жоғары мекемелерінің рейтингтерінде жоғары орынға ие. Университет жыл сайын өз түлектерінің жұмысқа орналасу деңгейінің жоғары екенін көрсетеді.
