Дзюдодан Қазақстан командасынан Елдос Сметов Париж Олимпиадасының чемпионы атанды. Осыған дейінгі Олимпиадаларда Елдос 2016 жылы — күміс, 2020 жылы қола жүлде еншілеген еді.
27 шілде күні Париж олимпиадасындағы белдесуінде ол Қазақстанға алғашқы алтын медаль сыйлады.
Қазақ балуаны Париждегі ойындардың финалында Лука Мхеидземен (Франция) күресіп, қарсыласынан басым түсті.
Тараздық татами шебері осыған дейін 2016 жылы Рио Олимпиадасында финалға шыққанымен қарсыласына есе жіберіп алған. Ал Токиодағы ойындарда Торнике Чкадуаны жығып, үздік үштікті түйіндеген.
Жалпы Сметов үшін Парижде жеребе оңай болған жоқ. Іріктеуде Торнике Чкадуаны (Нидерланд), Дильшот Халматовты (Украина), ширек финалда Токио Олимпиадасының күміс жүлдегері Янг Ю Вейді (Тайпей) жыққан. Ал жартылай финалда әлем чемпионы, Еуропа чемпионатының 3 дүркін жеңімпазы Франсиско Гарригостан (Испания) қосымша уақытта (golden score) басым түсті.
