Нысана көздеуден қазақстандық Ислам Сәтбаев пен Александра Ле пневматикалық мылтықпен он метрден атуда аралас командалық жарыста Париж олимпиадасының қола жүлдегері атанды. Олар үшінші орынға таласта Германия командасынан басым түсті.
Сәтбаев пен Ле жұбы іріктеу кезеңінде Қытай, Оңтүстік Корея, Германиядан кейін төртінші нәтиже көрсетіп, қола медальға таласуға мүмкіндік алған еді. Бұл бағдарламада алтынды Қытай, күмісті Оңтүстік Корея спортшылары еншіледі.
Бұл — Қазақстанның Париж олимпиадасындағы алғашқы жүлдесі.
Қола жүлде жеңіп алған қазақ спортшылары мен олардың бапкерлеріне мемлекеттен 75 мың АҚШ доллар бөлу белгіленген. Ал Олимпиада чемпионына — 250 мың АҚШ доллары, күміс жүлдегерге 150 мың доллар беріледі.
