Қазақстан бас прокуратурасы Киевте қазақстандық журналист Айдос Садықовты атып кетті деген күдіктілердің біреуі қамалғанын хабарлады.
Ресми басылымдардың хабарлауынша, «мемлекет басшысының тапсырмасымен» бас прокуратура 18 маусымда Киев қаласында Айдос Садықовқа жасалған қастандық дерегі бойынша қылмыстық іс қозғаған.
Украинаның құқыққорғау органдары оқиғадан соң қысқа мерзімде осы қылмысты жасаған тұлғаларды анықтаған болатын.
«Бас прокуратура Украинаның құзіретті органдарына Жақанбаев пен Қаратаевтың жасалған қылмысқа қатысы туралы қылмыстық істің материалдарын беру жөнінде халықаралық тергеу тапсырмасын жолдады. 21 маусымда Алтай Жақанбаев Қазақстан Республикасының ішкі істер органдарына өз бетінше хабарласып, одан істің мән-жайы бойынша жауап алынды. Сол күні ол осы қылмысты жасады деген күдікпен ұсталды» деп хабарланды ведомстводан.
Екінші күдікті Мейрам Қаратаевтың қайда жүргенін анықтау үшін жедел іздестіру шаралары жүріп жатқаны айтылады.
Киевте тұратын журналист Айдос Садықовты 18 маусым күні үйінің жанында көліктің ішінде әлдебіреулер атып кеткен болатын.
Украина астанасында қастандыққа ұшыраған қазақстандық журналист Айдос Садықовты өлтіруі мүмкін күдіктілердің есімі аталған соң олардың біреуі Қазақстан полициясында қызмет атқарғаны хабарланды. Бірақ оны Қазақстанның ішкі істер министрлігі жоққа шығарып, мәлімдеме жасады.
