3 тамызда 75 жасқа қараған шағында көрнекті ұшқыш-ғарышкер, авиация генерал-лейтенанты, техника ғылымдарының докторы, Қазақстанның Халық қаһарманы, Ресей батыры Талғат Мұсабаев дүниеден озды.
1951 жылғы 7 қаңтарда дүниеге келген Талғат Мұсабаев 1994 жылы егемен Қазақстанның алғашқы ғарышкері және ашық ғарышқа шыққан тұңғыш қазақ болды. Кәсіби мансабында ғарышқа үш сапар жасады, жалпы ұзақтығы бір жылға жуықтады. Сонымен қатар ол 7 мәрте ашық ғарышқа шықты. Талғат Мұсабаевқа дейін ашық ғарышта бір тәуліктен артық уақыт ешкім болмаған, оның жетістігі Гиннесс рекордтар кітабына енгізілді.
Мұсабаев 2000 жылдардың басында әскери авиация саласындағы жауынгерлік даярлық бөлімін басқарды, Жуковский атындағы әскери-әуе академиясы басшысының орынбасары болды. 2005 жылы Қазақстан мен Ресейдің бірлескен «Бәйтерек» жобасын басқарды.
Ол Қазақстанның білім және ғылым министрлігіне қарасты Аэроғарыш комитетінің төрағасы болды. 2007 жылы құрылған Қазақстанның Ұлттық ғарыш агенттігін басқарды.
2017 жылдан 2023 жылға дейін Талғат Мұсабаев парламент сенатының депутаты болды.
Қазақстан президенті Қасым-Жомарт Тоқаев әйгілі ұшқыш-ғарышкер, Қазақстанның Халық қахарманы, мемлекет және қоғам қайраткері Талғат Мұсабаевтың отбасы мен жақындарына көңіл айтты деп хабарлады Ақорда.
