АҚШ пен Украина президенттері қол қоюы тиіс минералдар туралы келісімге қол қойылмай қалды. Кей ортада кездесудің аяқталмағаны айтылса, кейбір ортада басқосудың сәтсіз аяқталғаны хабарланды.
Халықаралық ақпарат агенттіктерінің хабарлауынша, 28 ақпанда АҚШ пен Украина президенттерінің Вашингтонда өткен кездесуі сәтсіз аяқталған. Тараптар Украинаның жер қойнауы туралы аралық келісімге қол қоймады. Олар жабық есік жағдайындағы қызу пікірталастан соң кездесуді шұғыл тоқтатты.
Владимир Зеленскийді құрметсіздік танытты деп айыптаған Дональд Трамп, бірден Truth Social әлеуметтік желісіндегі парақшасына жазба қалдырды.
Оның ойынша, Украина президенті бітімге келуге дайын емес.
«Бүгін біз үшін өте маңызды кездесу болды. Біз осындай қызу әңгіменің және қысымның әсерімен болмаса басқадай жағдайда еш түсінуге болмайтын нәрселер туралы білдік», — деп жазды Трамп.
«Бұндай эмоциядан нені түсінуге болады. Менің түсінгенім, Зеленский АҚШ араласқалы отырған бітімге дайын емес. Ол бізге құрметсіздік танытты. Ол енді бітімге дайын болған кезде келе алады, — деп жазды АҚШ президенті.
Зеленский Ақ үйден кездесу бітпей жатып шығып кеткен. Соңынан екі президенттің қатысуымен болатын баспасөз мәслихаты да өтпей қалған. Кейін ол да әлеуметтік жазбасында АҚШ-қа осы кездесу үшін алғысын білдірген.
Ақ үйде Зеленский мен Трамптың сөз таластыруы халықаралық ортада үлкен реакция тудырып жатыр.
