20 маусымға ауған түні Ирандағы қазақ диаспорасы мекендейтін Горган маңына зымырандар түсті. Бұл туралы Аramedia арнасына Иран қазақтары хабарлады.
Жергілікті адамдардың жіберген видеосына қарағанда, қаланың аспанында зымырандар жарқылы көрініп, дыбысы естілген. Кадр сыртындағы адамдар бұл көріністі бір сағаттан бері тамашалап отырғанын айтады. Зымырандар әзірге қаланың ішіне түспеген сияқты. Болжамдарға қарағанда Гүлстан провинциясының орталығы Горган қаласы маңындағы әскери гарнизондар нысанаға алынуы мүмкін.
Бұл төңіректе ядролық нысандар жоқ деп есептеледі. Бұған дейін Каспий бойын жағалай жатқан солтүстік провинциялар мен шығыс аймақ нысанаға алынбаған еді. Иран қазақтары әзірге өз арасы аман екенін, жалпы осы қалада қазақтар мекендейтін «Қазақ-махалла» маңы тыныш екенін айтады. Дегенмен олар өз алаңдаушылықтарын білдіріп, жағдай ушығып кетсе, Қазақстан жағы өздеріне атамекенге жетуге жәрдемдесе ме деп үміттенетінін айтады.
Тегераннан шығысқа қарай 400 шақырым қашықтықта орналасқан Горган — Ирандағы қазақ диаспорасы ең көп шоғырланған қала. Тұтас тұрғындар саны 300 мыңнан астам деп шамаланады. Гүлстан провинциясындағы халық саны 1 млн 600 мыңнан асады. Қазақтар провинциядағы Бәндар Түркімен, Аққала және Гүмбед қалаларында да орналасқан. Бұл провинцияда қазақтардан басқа түркімендер мен күрдтер шоғырланған. Ирандағы қазақтардың тұтас саны 3-4 мың деп шамаланады.
13 маусымда Израиль Иран қалалары мен ядролық нысандарын зымыран соққысына алды. Иран да қарымта зымыран шабуылын жасап, екі тарап әлі кезек-кезек атысып келеді. Екі жақтан да адам шығыны бар. Израиль Иран ядролық қаруға қол жеткізеді деп қауіптенсе, Иран өздерінің ядролық бағдарламасы тек бейбіт мақсатты көздейтінін айтады.
