Қазақстан бокс федерациясы Париж Олимпиадасының қорытындысы бойынша кеңес өткенін хабарлап, оның нәтижесін жариялады.
Ұйым бокстан ерлер командасының бапкерлік құрамы толығымен жұмыстан шеттетілгенін атап өткен.
Қазақстан бокс федерациясының шешімін дене шынықтыру және спорт істері бойынша комитеті мақұлдағаны айтылады.
«Осылайша, келесі өзгерістер жайында хабарлаймыз:
1. Бас жаттықтырушы Мырзағали Айтжанов және бапкерлік құрамдағы 10 маман, ҚБФ вице-президенті Азиз Қожамбетов қызметтен босатылды.
2. Қазақстанның еңбек сіңірген жаттықтырушысы Тұрсынғали Еділов Қазақстан бокс федерациясы президентінің кеңесшісі қызметіне тағайындалды.
Жаңа бапкерлік құрам кейінірек таныстырылады», — деп хабарлады Қазақстан бокс федерациясы.
Баршаға мәлім, жақында ғана федерация президенті қазақ боксына үлкен реформа қажет екенін мәлімдеген.
